Salvemos Peñamayor
La plataforma vecinal Salvemos Peñamayor entamóse por iniciativa de los vecinos/es desque supieron que’l Gobiernu del Principáu d’Asturies otorgó un permisu d’investigación minera conocíu como Astur A, sobre minerales como’l cobaltu, cobre, níquel, oru y plata, qu’afecta a cuatro conceyos (Bimenes, Llaviana, Nava y Piloña). Esi permisu consiste en trés años d’investigaciones sobre un terrén d’una estensión de 5.425 hectárees de la Sierra de Peñamayor y alredores, qu’incluye la realización de calicates. Esta investigación ye la primer fase d’una posible actividá estractiva.
Polo tanto, el nuestru oxetivu firme y non negociable ye aparar esti proceso d’investigación y la puesta en funcionamientu d’una esplotación minera nesta rodiada. Los nuestros argumentos parten de la indefensión de los afectaos por estos proyectos frente a les grandes multinacionales y resúmense nestos impactos:
Ambientales
- Contaminación d’agua soterraño y superficial: fontes d’abastecimientu de los llugares de la rodiada, bebederos pal ganáu, fontes, regueros…
- Modificación irreversible del paisaxe: mines a cielu abiertu y/o soterrañes, creación de pistes, balses de residuos mineros…
- Alteración de la Sierra de Peñamayor como corredor ecolóxicu ente’l Parque Natural de Redes y la marina centro–oriental d’Asturies.
- Daños a les praderíes, mases forestales como La Mata’l Texíu, desplazamientu d’especies animales, alteración de zones de cría d’especies protexíes…
Sanitarios
- Polvu en suspensión.
- Impactu acústicu producíu pol ruíu del pasu de camiones, voladures…
Socioeconómicos
- Perda de valor del territoriu y de les propiedaes: cases, cuadres, praos, cabañes…
- Repercusión negativa nes actividaes económiques: ganadería, caza, aprovechamientos forestales, embotelláu d’agua mineral, turismu rural y activu (hostelería y deportes de monte)…y, polo tanto, perda de puestos de trabayu.
Al patrimoniu histórico-cultural
- Pozu Funeres, túmulos d’El Cuetu de Fresneo…
- Perda de la forma de vida y del manexu tradicional del territoriu.
- Daños morales.
- Estroza de sitios d’arraigu sentimental de la población local.
Por too esto, esiximos a les alministraciones:
- Que se revoque’l permisu d’investigación concedíu y que nun s’autorice nenguna clas de llabor que seya principiu d’una actividá estractiva.
- Que los nuestros representantes miren polos nuestros intereses lo primero, informándonos de lo que ta socediendo y dexándonos decidir sobre’l nuestru territoriu, sobre’l nuestru futuru.
- Que los intereses lucrativos de delles empreses nun tean perriba de persones y comunidaes locales, de la nuestra manera de vida y vezos.
- Que nun se vuelva xugar colos nuestros sentimientos, vendiéndonos una vez más un futuru prometedor pa la nuestra tierra y que, a la hora de la verdá, nos vuelva dexar desolación, desemplegu y un futuru negru.