PLATAFORMA VECINAL
Salvemos Peñamayor
La Plataforma Salvemos Peñamayor ta formada por vecinos y vecines de Nava, Llaviana, Bimenes y Piloña, axuntaos pa defender la nuestra tierra y caltener l’estilu de vida que disfrutemos a lo llargo de xeneraciones frente a proyectos estractivos qu’amenacen la nuestra rodiada y el nuestru futuru.
Collabora col financiamientu llegal de la Asamblea de Nava.
El nuestru oxetivu
La Plataforma Salvemos Peñamayor naz cola mira d’oponenos al permisu d’investigación estractiva ASTUR A, de 217 cuadrícules mineres, concedíu pol Gobiernu del Principáu d’Asturies a la empresa británica Technology Minerals PLC. Esti permisu implica la investigación de cobaltu, cobre, níquel, oru y plata na Sierra de Peñamayor, afectando a los conceyos de Llaviana, Nava, Bimenes y Piloña.
Queremos aparar cualquier actividá estractiva en Peñamayor y alredores que pueda tener consecuencies irreversibles pa la nuestra salú, la nuestra rodiada y la nuestra tierra. Oponémonos firmemente a la investigación y estracción de mineral na Sierra de Peñamayor y lluchamos por preservar el monte y les actividaes tradicionales que caltuvieron esta tierra viva a lo llargo de sieglos.
Nun podemos dexar qu’esti proyectu mineru arruine lo que xeneraciones construyeron y curiaron. Creyemos na necesidá de caltener el nuestru patrimoniu y la nuestra forma de vida, y defendemos el derechu a decidir sobre’l nuestru territoriu.
Lo que queremos defender
La nuestra tierra, la nuestra forma de vida.
LA FASE D’INVESTIGACIÓN TIEN RIESGOS
Impactos de la Investigación
Esta fase d’investigación nun ye un trámite ensin más, tien riesgos serios. Les actividaes d’investigación minera na Sierra de Peñamayor y alredores impliquen la realización de zanxes fondes, perforaciones, calicates y sondeos que pueden comprometer la estabilidá del terrén, afectando negativamente a camperes, caminos… Pueden tener consecuencies graves na nuestra rodiada natural y na nuestra calidá de vida. Amás, estes acciones van dexar buelgues visibles y durables nel paisaxe.
Les fontes y acuíferos qu’abastecen d’agua a la población y a les actividaes agrícoles y ganaderes cuerren el riesgu de que se filtrie material tóxico y se contaminen.
El ruíu y el polvu xenerao por estes actividaes tamién va alteriar significativamente la tranquilidá de la zona, afectando tanto la salú como’l bienestar de los vecinos y vecines.
La esplotación minera
Ye fundamental entender que si’l proyectu d’investigación mineru na Sierra de Peñamayor sigue alantre y se demuestra la existencia d’estos minerales, va ser perdifícil frenar l’apertura d’una esplotación minera. Desque se confirmen estos recursos, los intereses económicos y llegales que s’activen faen que detener el procesu seya muncho más complexo. Por eso, si nun queremos una mina, tenemos que torgar que se lleve alantre esta investigación.
Pistes y balses de residuos
La construcción de pistes pal accesu de maquinaria pesao y balses de residuos en Peñamayor diba alteriar la rodiada natural de forma irreparable. Estos elementos representen un riesgu constante de contaminación ambiental.
Contaminación a un plazu llargu
Los residuos tóxicos que se xeneren mentes ye la esplotación pueden tener efectos arrasadores a un plazu llargu sobre l’agua, l’aire y el suelu. Les xeneraciones futures diben heredar una rodiada contaminada, poniendo en riesgu la so salú y bienestar.
Impactu económicu
Al revés que la minería tradicional, la minería moderna ye automatizada y xenera menos emplegos directos. Amás, aveza a funcionar por subcontrates con mano d’obra deslocalizao, lo que mengua entá más l’impactu positivu nel emplegu local. Esta actividá pue afectar al turismu, la ganadería y la pureza del agua mineral local, poniendo en riesgu los emplegos de les families de la rexón. Amás, la vida útil tan curtia d’estos proyectos pue dexar a los conceyos con un vacíu económicu significativu al zarrar, limitando la so capacidá de desenvolvimientu en comparanza con otres inversiones más sostenibles que podíen llevase a cabu.
Desvalorización de propiedaes
L’actividá minera pue rebaxar el valor de viviendes, praos y cabañes. Lo que güei ye una zona tranquila y natural diba vese impactada pola minería y l’usu de camiones y maquinaria pesao, lo que diba repercutir nes economíes locales.
Impactu na biodiversidá
Les operaciones d’estracción diben desplazar especies locales y estrozar hábitats cruciales pa la flora y fauna. La biodiversidá, yá en riesgu, diba vese afectada gravemente.
Mines a cielu abiertu o soterrañes
La fase d’esplotación minera diba implicar escavaciones que diben modificar fondamente’l paisaxe de la Sierra de Peñamayor. Los repuelgos dexaos nel terrén diben ser permanentes, alteriando irremediablemente esti espaciu natural.